Cebu City – Gihan-ay na sa kagamhanan sa dakbayan sa Sugbo ang pagpabalik sa biyahe sa 1,720 ka PUJs o public utility jeepneys basta mosubay lang sa gilatid nga guidelines ubos sa bag-ong normal.
Sumala pa ni Mayor Edgardo Labella, mobiyahe ang naasoyng mga dyip sa rota nga aprobado sa LTFRB o Land Transportation Franchising and Regulatory Board ug sa CCTO o Cebu City Transportation Office.
Pagapilion ang mga PUJ nga tugtang mobiyahe sa bag-o lang gihulmang Ad hoc Committee nga gipangulohan niKonsehal James Cuenco base sa gitugot nga rota ug gidaghanon sa unit nga padaganon sa unang hugna.
Matod ni Labella, buot nila nga hinay-hinayon pagpabalik sa karsada ang mga dyip de pasahero.
Ang 1,720 kabahin lang sa5,000 ka kinatibuk-ang gidaghanon sa mga PUJ nga nagdagan sa siyudad niadtong wala pay pandemic.
Ang ilang rota mahimong usbon depende sa sitwasyon o dapit nga magkuwang sa sakyanan sanglit duna na may modernong mga bus nga nagdagan.
Ang mga drayber ug ilang dyip kinahanglan gihapong hashasan gikan sa Oktubre 30 ngadto sa Nobyembre 3.
Ang kalipikadong mga drayber kinahanglang moduso sa gikinahanglang mga dokumento sama sa operation certification, licenses, ug health clearances.
Gawas niana, ipaubos usab sila sa rapid antigen-antibody test nga sundan sa swab test kon sila magpositibo. (Jhon Tadlip/JTY, photo courtesy of LGU vs Covidph)
(Source: Cebu City Provincial Information Office)
