Sarangani Province – Mi-anib ug nanumpa na sa Partido Federal ng Pilipinas (PFP) si Sarangani Governor Ruel Pacquaio ning nakalabay’ng adlaw, Mayo 1, 2024.
Gihimo ang maong pagpanumpa sulod sa Diamond Hotel, Manila ug mismo gayud si Pangulong Ferdinand Marcos Jr. maoy nagpanumpa.
Matud ni Gov. Pacquiao: Dakung dungog alang kanako ang pagpanumpa isip usa sa pinakabag-o nga miyembro sa Partido Federal ng Pilipinas atubangan ni Presidente Ferdinand R. Marcos, Jr. Sa akong pagsugod niining bag-ong panaw, ang akong tumong mao ang pagpaduol sa serbisyo publiko ngadto sa katawhan sa Sarangani, nga nagtultol sa probinsiya ngadto sa pagtubo ug kalamboan. Manag-uban, gigiyahan sa panaghiusa, pag-uswag, ug abli sa tanan, atong dad-on ang atong mga konstituwente ngadto sa mas maayong ugma.
Nasayran, nga si Gov. Pacquiao, usa lamang nga nanumpa ngadto sa PFP sa kinatibuk-ang 11 ka Gobernador, 14 ka Bise Gobernador ug mga Board Members gikan sa lain-laing lugar sa nasud ning milabay’ng adlaw.
Kahinumdoman nga mikandidato kaniadto si Gov. Ruel ilalum sa partidong People Champ Movement (PCM), apan karon kalit lamang kining mi-ambak sa PFP nga gikahikurat sa mga Sarangans.
Pero isip re-aksiyon, gikanayon ni South Cotabato Governor ug PFP National President Reynaldo Tamayo nga: “Dako ang among pasalamat sa among mga bag-ong miyembro sa partido sa ilang pagtuo ug panaghiusa sa mga pangandoy ug tumong sa Partido Federal ng Pilipinas. Nagpadayon kami sa pagpalig-on ug gila-uman nga daghan pa sa atong mga kaubang public servant ang manumpa isip sakop sa PFP sa mosunod nga mga adlaw.” (Rem C. Agdon)