El 33rd Infantry Battalion (IB) del Philippine Army ya facilita el rendida del 36 armas de fuego o pusil sin licensia na provincia del Maguindanao del Sur del Viernes, asegun con el militar del Domingo.
El rendida del mga pusil sin licensia del mga residentes es un resulta del colaboracion entre el militar y el mga gobierno municipal del Shariff Aguak, Shariff Saydona Mustapha, Datu Abdullah Sangki, Mamasapano, Radjah Buayan, y Sultan sa Barongis, na Maguindanao del Sur.
Si Tiniente General William Gonzales, el comandante del Western Mindanao Command (Westmincom), ya atribui con el significante ganancia con el resolucion firme del Joint Task Force Central para suporta con el programa de Balik-Baril, que el objetivo para limpia con el comunidades desde’l arimienta de violencia.
El mga pusil que ya rendi mga residentes ta inclui dos rifles calibre .30 de Sniper, un 40-milimetro (mm) rocket-propelled grenade launcher, sinco 40-mm M79 Grenade Launchers, dos 40-mm M203 Grenade Launchers, un rifle de calibre .30 Garand, un rifle de calibre .30 M1 Garand que ya converti como un rifle M14, un rifle calibre de carbine 5.56-mm Bushmaster, un rifle de Carbine calibre .30, dos shotgun de 12-balinas, 11 9-mm Submachine Guns, dos calibre .45 Submachine Guns, seis calibre .38 pistolas, y un calibre .45 pistola.
Con el mga armas de fuego que ya rendi ya presenta con Brigadier General Oriel Pangcog, comandante del 601st Infantry Brigade, Alcalde Akmad Ampatuan, Jr. del municipio de Mamasapano, y mga representantes desde’l otro gobierno local, y despues con el mga materiales de Guerra ya pone bajo’l custodia del 33IB para el propio disposicion.
El Westmincom, por medio del mga joint task forces, ta continua el esfuerzos para sustene paz peace por medio de intensificar el conducida del operaciones combate militar y operaciones civil-militar na Oeste, Sur y Centro partes del Mindanao. (B. Garcia)