Nainaguraran ken nabendisionan ti PGIN contact tracing operation center iti kapitolio probinsial.
Indauloan ni Rev. Father Ian Rabago ti naisayangkat a panagkararag ken pormal a nalukatan ti nasao a pasilidad babaen ken ni Gob. Matthew Marcos Manotoc a binayabay ti mangidadaulo ti contact tracing team a ni Major Roxanne Parado.
Iti panangipaay ti gobernador ti mensahena, impadanunna ti panagyaman kadagiti amin nga adda ti likud iti naimballigian a pannakaistablisar ti naso a pasilidad kangrunaanna ken ni Parado ken ni Dr. Norman Rabago a COVID consultant ti probinsia.
Inbunannagna a nakaim-importante ti naipasdek a pasilidad par iti naal-alisto a pannakaipatungpal ti ‘’contact tracing’’.
Binigbig ti gobernador ti kinapateg ti ‘’contact tracing’’ ken namnamaenna a babaen iti nasao a pasilidad ket ad-adda pay a mapapigsa ti pananglaban ti probinsia ti COVID-19.
Kagiddan daytoy, nagyaman ni Gob. Matthew Marcos Manotoc kadagiti amin a kameng ti COVID 19 team ken dagiti frontliners ti probinsia.
Kunana a dakkel ti akem dagitoy iti panagbalin laengen a tallo dagiti aktibo a kaso ti COVID-19 ditoy probinsia.
Impadanunna ti panangnamnamana nga agtalinaed a nababa ti bilang dagiti aktibo a kaso ti COVID19.
Nupay kasta, kunana a nu adda dagiti baro a kaso ket agsadag ti probinsia iti ‘’operation center’’ para iti al-alisto a pannakalapped ti panagwars ti virus. (Ronald Domingo, RPN DZRL Batac)
(Source: Provincial Government of Ilocos Norte)