CAGAYAN DE ORO CITY- Gitakda na nga mosang-at ang otoridad sa kaso batok sa usa ka babaye ug lalaki nga giingong nasapon sa balor usa ka milyon ka pesos sa gituhuang shabu diha sa Capt. Vicente Roa Street sa barangay 30 ning syudad sa Cagayan de Oro. Ang mga suspetsado gikatahong mga benepisyaryo sa Pantawid Pamilyang Pilipino Program o 4Ps sa gobyerno.
Matud pa ni Col. Henry Dampal, ang city police director sa dakbayan nga ang mga suspetsado nailang sila si Baima Jadjisamed, 33 anyos nga taga, Tibasak, Macasandig ug si Paul Torres, 31 nga taga barangay Carmen, pulos sakop ning dakbayan sa Cagayan de Oro.
Gibutyag ni Dampal nga nasakmit sa mga otoridad gikan sa mga suspetsado ang 152.41 grams sa gituhuang shabu sa 12 ka mga sachets nga gibanabanang mokantidad sa P1,036,388. Si Jadjisamad anaa sa watchlist sa Philippine Drug Enforcement Agency.
Si Capt. Ernesto Sanchez nga namuno sa mga arresting officers nag-ingon nga si Torres nagdrive sa taxi alang kang Jadjisamad. Gitin-aw nga wala nuoy drugdens nga gioperate ang mga suspetsado apan nalambigit sa distribution sa maong substance gikan sa Cagayan de Oro.
