Cebu City – Gitakdang ipaubos sa barangay Labogon ug Paknaan, dakbayan sa Mandaue ang ilang lugar ubos sa state of calamity karong adlawa nunot sa miulbo nga sunog.
Sa nasayran, nasunog ang kabalayan sa sityo Latasan,Labog on ug Zone Patatas, Paknaan niadtong Biyernes.
25 ka balay ang naugdaw nga gipuy-an sa 76 ka pamilya o 300 ka tawo.
Suma pa ni Kapitan Amado Manatad, kinahanglan nilang mapaubos sa state of calamity ang  barangay para sayon ra silang makagamit sa pundo aron pagtabang sa mga biktima.
Matod niya, sa Lunes nila kini himoon kay ablina ang bangko ug sa miaging adlaw hangtod gahapon nangita lang una silag paagi nga mapakaon ang mga nasunogan.
Susama usab niini ang gisulti ni Kapitan Malaquias Soco sa Paknaan.
Suma pa ni Soco, ila pang tan-awon ang ilang quick response fund kon naa pa bay nahibilin.
Kini tungod kay nakasinati man usab sila og baha duha ka semanana ang nakalabay.
(Jhon Tadlip/ JTY, photo courtesy by Gestony Laniohan)
(Sources: Mandaue City Fire Station | Barangay Labogon and Barangay Paknaan – LGU)
