Iriga City — Pinara kan incident management team kan Iriga an paghandal kan publiko sa biglaan na pagkakaigua nin 13 kaso kan covid sa nagtalikod na aldaw.
Ini an ipinahayag ni Mr. Peter Lagyap, spokesperson kan IMT kasabay kan pagsabi na an 13ng ini resulta na kan saindang contact tracing na ginibo sa nainot na tinamaan nin covid sa barangay San Roque, San Miguel asin San Francisco.
Sigun sa saiya, pito na sana kuta an positive cases, alagad sa pagpositibo kan 13 liwat na nagin 20 an positive case, mientras na 31 pang iba an nakarecover naman sa hilang asin tulo man an binawian nin buhay.
Katakod kaini, padagos na nangapudan si Lagyap publiko na mantineron sana an minimum health protocol arog kan pagsupong nin face mask, pagsupong nin face shield asin social distancing tanganing makaibitar na maulakitan kan nasabing hilang.
Kun nagkaigua man nin arog kaining numero, ini hali sa gabos sa mga nakasalamuha kan nainot na kaso sa sinambit ng barangay, kasabay kan paglaom na naubos na ninda an mga nagkaigua nin close contact sa mga pasyente.
Sa presente nagpa-utob naman nin home clockdown an IMT sa duwang harong sa San Roque, sarong harong sa San Miguel asin sarong harong man sa San Francisco tanganing maibitaran an local transmission kan hilang sa lugar.
(OIC Melvin Barayoga, RPN DZKI Iriga, photo courtesy by Sir Peter Lagyap Facebook Page)
(Source: Interview with Mr. Peter Lagyap – IMT Spokesperson Iriga City)