Cebu City – Patay ang upat ka mga tawo, ug 15 ang mga na injured human daruha sa usa ka dumptruck ang siyam ka mga sakyanan sa Sitio Sombrea, Barangay Lawaan 1, Dakbayan sa Talisay, buntag sa Biyernes, Disyembre 3, 2021.
Sa 15 ka mga na angol, duha ang gidala sa Talisay City District Hospital, samtang ang 13 wala na magpadala sa tambalanan.
Lakip sa giharos sa dumptruck ang usa ka Beep Bus nga dunay byahe nga Parkmall-Minglanilla, Lalamove Van, multicab, tricycle nga tangkal/tura-tura, motorsiklo ug ang nag biseklita.
Sa video nga kuha sa CCTV, unang gisaghiran sa truck ang green nga multicab, dayon ang blue nga Beep/Mini Bus.
Usa ka Hazel Busa nga padung unta sa South sa Sugbo, kinsa usa sa mga naharos mibutyag nga naka dungog siya nga gi-serbatuhan siya sa driver dumptruck.
Gihulagway ni Busa nga kusug ang padagan sa truck ug gibana-bana niya nga naa sa 100 kph ang gikusgun sa dagan.
Matod niini nga pipila lang ka segundo daghan na ang nadamay.
Gibana-bana nga moabot ug 20 metros ang distansya sa pagdaro hinungdan nga nagka tapok ang mga sakyanan.
Sigon pa ni Busa nga nag zigzag ang dagan sa truck, ug nagtoo kini nga gituyo aron paglikay nga way madasmagan.
“Ang naa sa jeep looy kaayo kay nangalagpot,” matod ni Busa.
Nagkanayon kini nga ang nag bike nalatayan gyud sa ligid sa truck.
Gi-respondehan sa rescue group sa syudad ang maong hitabo nga naka mugna ug kahoot sa dalan sa lugar, ug pagtapok sa mga nanguryoso sa hitabo.
(News & photos courtesy of Talisay City Disaster and Risk Reduction Management Office)
