Mokabat sa 422 ka tawo ang nasikop sa Cebu Provincial Police Office (CPPO) atol sa gipakusgang pagpatuman sa mga lokal nga ordinansa sa tibuok probinsya kagahapon Agosto 15, 2026.
Naghimo ang kapulisan og 258 ka operasyon batok sa lain-laing paglapas sa ordinansa ug traffic regulations. Lakip niini ang 62 ka kaso sa pag-inom sa pampublikong lugar, 22 sa pagpanigarilyo sa public places, 11 nga walay sapot sa ibabaw sa lawas, 43 ka menor de edad nga nakalapas sa curfew, ug pito ka kaso sa paggamit og karaoke lapas sa gitugot nga oras.
Kadaghanan sa mga kaso kay may kalabotan sa traffic ordinances, diin 277 ka violators ang gipamulta. Samtang 145 ka tawo ang gipasidan-an o gipagawas, nga mikabat sa 422 ang kinatibuk-ang naabtan sa operasyon.
Ang operasyon gihimo sa nagkalain-laing component cities ug municipalities sa Cebu isip kabahin sa Safer Cities Initiative, aron mapadayon ang kahapsay sa mga pampublikong lugar ug mapugngan ang mga paglapas nga mahimong mosangpot sa mas seryosong problema sa kalinaw ug seguridad.
Gipasiugda sa CPPO nga magpadayon ang hugot nga pagpatuman sa mga lokal nga ordinansa ug giawhag ang publiko nga mosunod sa balaod ug makigtinabangay sa mga otoridad alang sa mas luwas ug hapsay nga komunidad.
📸 CPPO
I via Renante Socia Lada