Zamboanga del Sur – Modugang og ₱ 75 milyones nga budget karong tuiga si Governor Victor Yu aron nga mas daghan pang barangay ug eskwelahan sa tibuok Zamboanga del Sur ang matauran og libreng Wi-Fi.
Mao kini ang giluwatang pamahayag sa gobernador atol sa gift-giving activity nga gipahigayon sa lungsod sa Dimataling niadtong nakalabayng semana.
Sumala ni Governor Yu nga gikan sa 681 ka mga barangay sa lalawigan, sobra 300 na ka barangay ang natauran ug nakapahimulos sa Victory Free Wi-Fi nga gipangunahan sa Communication and Information Systems Office sa Provincial Capitol.
Kahinumdoman nga gihingusgan gayud ni Gov. Yu nga matauran og Wi-Fi connection ang mga barangay aron makatabang sa mga estudyante sa ilang online studies ilabina karong panahon sa pandemya.
Gawas sa Wi-Fi gisugdan na usab sa gobernador ang paghatag og smart television sa mga eskwelahan sa probinsya aron nga makaabag sa learning strategies sa mga estudyante ug magtutudlo.
(News & photo courtesy of Victory Zamboanga del Sur)