Nagpakita sa ilang padayong pag-alagad sa komunidad ang Bureau of Fire Protection-Piñan pinaagi sa pag-apil sa GC on Wheels Medical Outreach Program nga gipahigayon sa Covered Court sa Barangay Poblacion.
Ubos sa pagpangulo ni SFO3 Elmar M. Pagente, Acting Municipal Fire Marshal, mitambong ang mga personnel sa Piñan Municipal Fire Station sa kalihukan nga nagtumong sa paghatag og mas sayon nga access sa nagkalain-laing serbisyo. Lakip niini ang health check-up, X-ray, dental services, eye check-up ug uban pang medical assistance.
Dili lang serbisyong panglawas ang gihatag sa outreach program tungod kay nakabenepisyo usab ang mga residente sa livelihood ug agricultural assistance sama sa libreng mga liso, seedlings ug abono. Gipahigayon usab ang feeding activity alang sa mga kabataan isip dugang nga suporta sa ilang nutrisyon.
Pinaagi sa aktibong pag-apil sa BFP-Piñan, gipakita nga ang ilang serbisyo dili lamang kutob sa pagtubag sa sunog ug emerhensiya, kondili naglakip usab sa mga inisyatiba nga nagpalig-on sa kahimsog, kahandam ug kaayohan sa komunidad.(JENIFFER JR. DELICA)
Source: BFP R9 Piñan Fire Station