Duwa ng kaso nin COVID-19 Omicron Variant an naitala sa rehiyon Bicol. Saro sa banwaan nin Bombon asin saro sa banwaan nin Tigaon sa Camarines Sur.
Segun sa Departamento de salud sa Bicol, negatibo sa COVID-19 an gabos na close contact kan nagpositibo sa omicron variant sa Bombon. Alagad 9 sa 105 na close contact kan taga Tigaon an nagpositibo sa COVID-19.
Ipinadara na kan ahensiya an resulta kan specimen kan mga ini sa Philippine Genome Center para sa genome sequencing tangani maaraman kun may mga naulakitan nin omicron variant o iba pang variants sa 9 na close contact na nagpositibo sa COVID-19.
Marikas na mang ulakit o makaulakit ang omicron variant segun sa DOH kaya importante nanggad segun sa ahensiya an pagsunod man giraray sa mga pigpapautob na public minimum health standards siring kan pagsulog nin face mask asin pag-iwas sa mga matatawong lugar.
Pig-eenkaminar man an pagpabakuna tangani makaibitar sa malalang sintomas kan helang.
” An tawong may omicron, nakakaulakit maski bakunado ini. May posibilidad man na magka omicron an sarong tawo na bakunado na. Pero epektibo an bakuna sa pagtao nin proteksiyon kontra sa malalang helang asin kagadanan na dara kan COVID-19 asin variants kaini. Kaya sa mga dai pa nagpapabakuna, magpabakuna na,” sabi ni Dr. Ernie Vera, Regional Director kan DOH Bicol.
Ngunyan na may duwang kaso na nin omicron variant sa rehiyon, saro sa pangapudan ni Department of the Interior and Local Government Regional Director Atty. Anthony Nuyda sa mga lokal na gobierno na lugod limitaran na man muna an pagpaluwas nin harong sa mga dai pa bakunado.
“Suportado mi an ipinaluwas na order kan Metro Manila Development Council na an mga dai pa bakunado, dai pwede magluwas sa saindang mga harong asin dai papalaugon sa mga restaurant asin iba pang establishments. Kaya nangangapudan ako sa mga lgu na kung pwede maghimo man nin siring na orden na paglimita kan pagluwas sa harong kan mga dai pa bakunado.
Although dai ta kuta gusto gibuhon, ang importante maprotektaran an gabos. Kung talagang mas delikado sa mga baku bakunado an variant na ini, mas marhay kun sinda na man mismo maglimitar sa pagluwas ninda nin harong hangga’t dai pa sinda nababakunahan,” sabi ni Nuyda.
Sa pinakahureng datos kan DOH, 53% pa sana kan target na populasyon sa Bicol an nababakunahan kontra COVID-19.
“Hangga’t dakul po ang dai pa nababakunahan asin nagmamatagas an payo, mas marikas po an paglakop kan omicron. An pag enkaminar na magpabakuna an gabos baku po taliwas sa human rights. Dapat po maintindihan ta na sa human rights, mas may halangkaw na derecho, iyo po an derecho kan nakakadakul. Dai ta lang po pag-isipun an satuyang derecho, hilingon ta man po an mas halangkaw na derecho na maprotektahan an kadaklan na porciento kan satuyang populasyon.
Kung dai pa po kamo nagpabakuna, dai po kamo magluwas nin harong ta kamo po an most at risk. Kamo samuya an madara nin problema pag kamo an nagkahelang nin COVID 19. Baku lang po kamo an maapektaran kundi maging an saindong pamilya, komunidad asin salud kan publiko,’ sabi ni Dr. Ferchito Avelino, Assistant Regional Director kan DOH Bicol.
Sa kabilugan, uminabot na sa 43, 064 an bilang kan mga nagpositibo sa COVID-19 sa Bicol puon kan nakaaging taon. 4.30% o 2 027 kaini an aktibong kaso mantang 1 999 na an total na bilang kan nagadan.
(Source: Bicol News)