Giturnover sa Department of Agrarian Reform (DAR) Zamboanga del Norte ang solar-powered water pump ngadto sa Lux Multi-Purpose Cooperative ug nagapod-apod og organic fertilizers sa mga agrarian reform beneficiaries (ARBs) sa Gutalac, Zamboanga del Norte aron suportahan ang produksiyon sa uma ug mapalig-on ang panginabuhian sa mga mag-uuma.
Gipangulohan ni PARPO I Engr. Alfonso A. Tan ang turnover uban sa mga opisyal ug personnel sa DAR, lakip sila PARPO II Daisy Dell Suan Digamon, MARPO Limuel G. Regalado, MARPO Florian B. Tolentino, ug ARPO II Maria Luisa A. Alingal.
Gitumong sa solar-powered water pump nga makahatag og mas barato, kasaligan, ug environment-friendly nga tinubdan sa tubig alang sa irigasyon. Pinaagi niini, maminusan ang pagsalig sa diesel ug ang gasto sa pag-operate sa mga mag-uuma, ilabina panahon sa ting-init.
Gipang apod-apod usab sa DAR ang organic fertilizers ngadto sa walo ka farmers’ groups, lakip ang San Vicente, Lux, Banganon, Canuto Enerio, ug San Roque Gutalac cooperatives, ingon man ang mga farmers’ associations sa Barangay Buenavista, Gutalac, ug Upper Gutalac.
Gipasalamatan usab ni Gutalac Mayor Eddie Justin T. Quimbo ang DAR sa paspas nga paghatag sa water pump, nga importante alang sa padayon nga pagpatubig sa mga umahan sa humay.
Gipakita sa maong inisyatiba ang paningkamot sa DAR ubos sa pagpangulo ni Secretary Conrado M. Estrella III nga mapalambo ang produktibidad sa mga mag-uuma pinaagi sa renewable energy ug mga importanteng farm inputs, samtang mapalig-on ang usa ka malungtarong ug mas kaugalingong agricultural sector.(IKEN B. GULLEM)
Source: DAR Zamboanga del Norte Province