Mikabat sa 20 ka mga bata nga adunay special needs ang nakadawat og P5,000 nga financial assistance gikan sa Provincial Government of Zamboanga del Norte isip suporta sa ilang mga panginahanglanon ug pag-atiman.
Gipahigayon ang paghatag sa ayuda niadtong Agosto 17, 2026, sa Hall 3 sa Capitol Building, Dipolog City, ubos sa pagdumala sa Provincial Social Welfare and Development Office (PSWDO).
Sumala ni Acting Provincial Social Welfare and Development Officer Hannah Lou Gumapon-Mandantes, ang maong programa gisugdan niadtong miaging tuig aron matabangan ang mga pamilya nga nag-atiman sa mga batang adunay espesyal nga panginahanglan, ilabina sa mga gasto nga may kalabotan sa ilang pag-atiman.
Nagpasalamat usab si Ma. Liezel Belosverlas, inahan sa usa sa mga benepisyaryo, kang Governor Darel Dexter Uy tungod sa suporta sa provincial government alang sa mga batang adunay special needs.
Gipasabot ni Mandantes nga adunay daghan pang mga bata sa probinsya nga nanginahanglan og susamang tabang, apan ang pagpalapad sa programa ipahiuyon sa anaa nga pondo sa kagamhanang probinsyal.
Samtang, ang paghatag sa financial assistance gipangulohan ni Acting Provincial Administrator Charmie Yu, uban ni Mandantes.(IKEN B. GULLEM)
Source: Zamboanga del Norte Provincial News Network