Gikalipay karon ni Governor Steve Chiongbian Solon nga una matapos ang kasamtangang tuig 2021, duha (2) ka dagkong award ang nadawat sa Provincial Government sa Sarangani ilalum sa iyang Sulong Kalusugan ug Sulong Kapayapaan project ubos sa flagship program niini nga Sulong Sarangani.
Giila sa DOH-Regional Nutrition Council nga labing maayo sa nutrition program ang LGU Sarangani sa tibuok Rehiyon Dose, samtang gideklara pud sa DILG nga nasulod ang Sarangani Province sa Top 10 Highly Functional Provincial Anti-Drug Abuse Council kon PADAC sa entiro Pilipinas.
“Excellent” matud pa ang LGU Sarangani ug tanang pito (7) ka munisipyo niini sa Operation Timbang Plus program alang sa mga bata nag-edad singko (5) anyos paubos. Ang Sarangani usab ang adunay pinakadakong giubos sa numero sa mga bata entiro Region 12 nga wasting o kulang sa gibug-aton sulod sa mga tuig 2019 hangtud tuig 2021, apil ani nga award ang LGU Kiamba.
Giila pud ang Nutri-Eskwela radio program sa Radyo Kasaganaan sa LGU Maitum. Gideklara usab nga 1st runner up sa regional outstanding barangay nutrition scholar ang taga-Malungon si BNS Roselyn Lapaz.
Samtang, sa kampanya sa ilegal nga druga, nakakuha ang PADAC Sarangani og 95 percent adjectival rating ug 100 percent assessment score nationwide.
Subling gipamatud-an sa maong mga pasidungog nga anaa sa sakto nga direksyon ang programa ni Governor Solon, kuyog ang mga maabtikong mayor ug sanggunian, kabahin sa nutrisyon sa mga kabataan, ug ang programa niini sa pagpakgang sa ginadiling druga, lakip na ang padayong pag-agni sa mga nalulong nga mupailalum na intawon sa community rehabilitation.
Sunod mga adlaw, gikatakda nga mudawat na usab og laing pasidungog ang pamunuan ni Governor Solon tungod sa makausa pa nasulod napud ang probinsya sa Sarangani sa most competitive provinces tibuok nasud, pag-ila kini gikan sa DTI.
Mutapusay na ang tuig apan padayon pang gina-bisita ang Sarangani. Niduaw bag-uhay lang ang kugihan nga DILG regional director sa Region 12 nga si RD Josephine Leysa ug ang bag-ong dako-dako sa mga police sa Rehiyon Dose ang aktibo nga si Brigadier General Alexander Tagum.
Gipadayag ni Police General Tagum ang iyang tinguha nga pakusgon pa ang boundary security control sa Rehiyon Dose aron dili basta-basta masudlan sa mga dautang elemento. Tuod man, hinanali kining giuyunan ni Governor Solon pinaagi sa paggahin og dakong pondo alang sa regional border checkpoint. Samtang, si DILG 12 RD Leysa ang usa sa dinapit nga bisita sa Kapitolyo sa Sarangani sa paghatag og mga award sa mga munisipyo nga ni-perform og sakto sa anti-illegal drug campaign sa administrasyong Duterte, apil mga partner agency hilabi na ang PDEA sa liderato ni Regional Director Naravy Duquiatan.
Subling gidayig ni RD Leysa ang LGU Sarangani sa pagpanguna ni Governor Solon sa daghang achievements nga nakab-ot. Sa bahin ni Governor Solon, gipasalamatan niini ang tanan, apil na sila Senador Manny ug Congressman Ruel Pacquiao, labaw sa tanan ang Ginoo. Makanunayon ang pagtrabaho nila Vice Governor Elmer De Peralta, mga board member, si Board Member Irish Arnado sa komitiba sa panglawas, Provincial Health Officer Dr. Arvin Alejandro, PADAC Focal Person Lizette Lopez ug Provincial Nutrition Coordinator Cha Jabines.
Hilabi pa mga health incharge sa mga kalungsuran, ang mga barangay nutrition scholar ug barangay health workers nga maoy gapanulod sa mga purok ug sityo, ug mga partner pribadong sektor nga nibuhos sa ilang mga programa sa Sarangani Province, sama sa Zuellig Family Foundation, Mahintana Foundation, Assisi Development Foundation, Vitamin Angels ug Seaoil Foundation.
(Source: Provincial Information Office – Sarangani)
