Base sa deklarasyon ngunyan na aldaw kang DOH-CHD Bicol sa saindang Facebook Account, si Bicol 46298 kompirmado na kaso ning OMICRON Variant.
Siya po 46 anyos na babae, may agom. Taga San Rafael, Tigaon, Camarines Sur. Sarong staff sa sarong Highschool digdi sa banwaan. Ini po nagpositibo sa COVID-19 kang Nov. 15, 2021 asin isinairarom sa mandatory quarantine poon Nov. 13, 2021 hanggang Nov. 27, 2021. Habang nasa quarantine nakamti ini ning mild na sintomas.
Dec. 13, 2021 kang ipinaaram kang PHO-Cam Sur na siya sarong kaso ning Delta Variant asin tolos na isinairarom kang Covid Team sa Mandatory quarantine asin pigtest ning RT-PCR kang Dec 15 na ipig deklara na POSITIBO kang DOH-CHD. Ang RT-PCR Test pig-otro kang Dec. 27, 2021 na ang resulta, NEGATIBO na sa COVID-19.
Poon Dec. 13 hanggang sa presente si Bicol 46298 naka quarantine man giraray. Gabos na Close Contacts na nahanap kang contact Tracing Team sa harong asin sa trabaho pigsairarom sa RT-PCR Testing kang Dec. 15, 2021.
Ngunyan pong aldaw pigkuanan po utro ning RT-PCR swab specimen si Bicol 46298 kang PHO-Cam Sur asin kang Tigaon Covid Team.
Ngunyan po na igwa na kitang kaso ning OMICRON Variant sa satuyang banwaan, nakikiulay po ang Municipal Inter Agency Task Force asin ang LGU-Tigaon na magpasiguro po kita lalo na sa pagsabat sa bagong taon.
Sunudon ta po ang minimum public health standards, magsulot ning face mask pirmi, iwasan ang lugar na gulping tao, paghugas ning kamot o pag gamit ning alcohol/disinfectant asin kung dai man pong importante kalakawan iwasan ang paghali sa harong. Ibitaran ta man po ang mga irinuman.
Kung kamo po may mamati na mga sintomas na kapareho sa sintomas kang COVID-19 ipasabot po nindo sa saindong mga BHERT (Barangay Health Emergency Response Teams)
(Source: DOH Bicol CHD | 103.1 Brigada News FM Naga, Camarines Sur Facebook page)