General Santos City – Dead on arrival ang usa ka giingong holdaper human kini nakig-away sa mga otoridad mga alas 2:40 sa kaadlawon niadtong Martes.
Base sa report, nahitabo ang insidente sa pagpanulis sa Roxas Avenue mga alas 2:20 sa kaadlawon diin usa ka lalaki ang biktima ug giingong pugsanon nga gikuha gikan sa iyang possession ang iyang pitaka, cellphone ug uban pang kagamitan.
Daling mitaho ang biktima sa Police Sation 1 sa General Santos City Police Office diin daling gilusad sa mga operatiba ang hot pursuit operation.
Naabtan sa mga otoridad ang suspek sa nahisgutang lugar ug didto nakigpinusilay pa kini sa mirespondeng mga pulis.
Narekober sa lugar nga nahitaboan ang usa ka Uzi submachine gun nga adunay mga buhing bala, mga basiyo sa bala ug uban pang kagamitan.
Gisusi pa sa kapolisan ang identity sa suspek kinsa nakabsan usab sa iyang kinabuhi sa wala pa kini nadangat sa tambalanan.
Si Police Colonel Gilberto Tuzon, director sa GSCPO, personal nga nisusi sa crime scene aron masiguro ang tukmang pagproseso.
Matod sa direktor nga posibleng nalambigit usab ang suspek sa pipila ka insidente sa pagpangawat o pagpanghold-ap dinhi sa dakbayan.
Gipaneguro usab niini nga ang GSCPO magpadayon sa pagpahigayon og mga operasyon ug mga programa aron mamintinar ang kahapsay ug kalinaw sa dakbayan.
Dugang pa niya nga ang paspas nga pagresponde sa kapulisan timailhan nga nagtuman kini sa ilang katungdanan.
(Source: General Santos City Police Office)
