Giawhag ni Gobernador BambI Emano ang katawhan sa Misamis Oriental lakip katawhan sa dakbayan sa Cagayan de Oro ug mga trabahante sa Kapitolyo Probinsyal nga suportahan ang bag-ohay lang gi-ablihan nga Farmers Market.
Ang maong merkado nahimutang kilid sa Kapitolyo Probinsyal ug bukas matag adlawng Biyernes diin mapalit ang nagkadaiyang preskong produkto sama sa mga lagutmon, prutas ug uban pa nga tinanom sa mga mag-uuma sa probinsya.
“Magpahibalo lang pud ko sa mga empleyado sa kapitolyo nga nibalik na atong farmers market, nanawagan ta sa inyo ug sa tanan palihog palit mo sa atong farmers market kada Biyernes, let us help our farmers once again,” panawagan ni Gobernador Bambi atol sa birtwal nga pagpakayab sa nasudnong bandila, adlawng Lunes, Nobiyembre 22, 2021.
Kahinumduman nga tuig kapin nahunong ang programa sa panginabuhian alang sa mga mag-uuma gumikan sa nasinatian nga hagit sa pandemya dala sa COVID-19 diin prayoridad sa panggamhanan nga maprotektahan ang katawhan nga mataptan sa maong virus.
Isip usa sab ka mag-uuma, nabati mismo ni Gobernador Bambi ang mga yangungo sa katawhan sa lalawigan rason nga iyang gipanghingusgan ang sektor sa Agrikultura pinaagi sa pagpatuman sa mga proyekto ug programa nga maoy mohatag kasulbaran sa dugay na nilang gipas-an nga problema.
(Source: Misamis Oriental Provincial Information Office Facebook page)
