Gidala sa Liloy, Zamboanga del Norte ang DENR Express Permitting on Wheels ug Mobile One Stop Shop niadtong Agosto 24 ug 25 isip ikalimang leg sa programa, aron mas mapaduol sa mga residente, negosyo, ug resource users ang environmental permitting ug regulatory services.
Gipahigayon sa Department of Environment and Natural Resources o DENR Region IX pinaagi sa Mines and Geosciences Bureau o MGB IX, Environmental Management Bureau o EMB IX, ug CENRO Liloy ang duha ka adlaw nga kalihokan nga gitambongan sa 131 ka kliyente. Nakaproseso sila og mga aplikasyon, nakapasa og requirements, nakapangutana, ug nakapangayo og tabang sa usa ka venue.
Nakaserbisyo ang EMB IX sa 90 ka kliyente, lakip ang pagproseso sa usa ka Environmental Compliance Certificate, upat ka Certificates of Non-Coverage, usa ka Permit to Operate, lima ka Hazardous Waste Generator IDs, ug tulo ka Pollution Control Officer accreditation applications. Samtang 18 ka kliyente ang natabangan sa MGB IX, lakip ang usa ka Ore Transport Permit, initial processing sa usa ka Geohazard Certification, ug pag-release sa usa ka Geohazard Identification Survey/Geological Site Scoping Report.
Nakapangalagad usab ang CENRO Liloy sa 23 ka kliyente nga nangayo og tabang sa mga aplikasyon nga may kalabotan sa foreshore ug lumber dealer. Gipasabot sa DENR nga ang maong serbisyo nagtumong nga himuong mas sayon, mas paspas, ug mas accessible ang environmental compliance, samtang gipasiugda ang responsableng paggamit ug pagpanalipod sa natural resources.(JENIFFER JR. DELICA)
Source: DENR Zamboanga Peninsula