Subling naghalad ngadto sa Ginoo ang Gobernador sa probinsya sa Sarangani tungod sa kalampusan sa MunaTo Festival ug sa padayong proteksyon, kalinaw ug kalambuan sa tibuok Sarangani.
Gipangunayan ni Governor Steve Chiongbian Solon ang pag-ampo atol sa magarbuhon nga 29th Foundation Anniversary ug 19th MunaTo Festival via virtual. Dili bag-o sa mga residente sa Sarangani Province ang kinaiya sa Gobernador nga maoy mangunay ug boluntaryo nga ga-ampo sa mga panagtapok, bisan sa mga meeting kauban ang mga department head sa Kapitolyo, asembleya sa mga barangay ug sa mga panagtigum kuyog ang mga dagkong opisyal sa gobyerno.
Mapasalamaton si Governor Solon nga padayong gi-proteksyunan sa Kahitas-an ang Sarangani gikan sa kalamidad. Batyag matud pa sa katawhang Sarangan nga adunay Ginoo sa taliwala gumikan ni-angat ang Sarangani Province alayon sa gihandum niini nga God-centered Prosperity.
Gidayig niini ang hugot nga panaghiusa ug pagtinabangay sa mga opisyales ug lumulupyo gikan nila Senador Manny ug Congressman Ruel Pacquiao, Vice Governor Elmer De Peralta, tanang board member, mga maabtikon nga mayores, bise mayores, konsehales, barangay kapitanes, barangay kagawads, mga purok ug sityo official, bisan na ang mga frontliner ug ang Tri-People – ang Kristyano, Muslim ug Lumad – hinungdan nga nagpabilin nga pinaka-gamay nga napatyan ug natakdan sa Coronavirus ang Sarangani Province sa entiro Region 12 ug sa tibuok Pilipinas.
Samtang, hilabihan ang kalipay sa baynte dos (22) anyos nga minyo nga babae, taga-Barangay Badtasan, Kiamba si Mariah Collien Galing, tungod sya ang na-swertehan nga napili sa online pa-raffle sa MunaTo Festival. Na-angkon ug nadawat na niini ang brand new Yamaha Sight motorsiklo nga kumpleto sa mga papeles.
Wala nya damha nga sya ang makadaog sa libuan ka mga online netizen nga ni-partisipar. Gani, kung lantawon ang Facebook page, niabot og 11,000 views ang nilantaw sa opening program sa MunaTo Festival, 10,000 views sa Sarangani Got Talent, 12,000 views sa Quiz MunaTo, 12,000 views sa Virtual Pakulo, 37,000 views nisaksi sa MunaTo Queen beauty pageant, ug 96,000 views ang nakigduyog sa selebrasyon sa Jesus Reigns. Daghan pang pahalipay ang gibuhian, sama sa mga cellphone, tablet, pocket wifi, cellphone load, ug cash.
Dako niining gipasalamatan si Governor Solon sa pagmugna og mga kalingawan alang foundation anniversary sa Sarangani bisan sa pandemya, ug sa STIPC-Sarangani Tourism and Investment Promotion Center gidumalahan ni Ms. Langlang Purisima, Sarangani Provincial Tourism Council sa pagpanguna ni Ma’am Michelle Lopez Solon, Sulong Kabataan program, Sulong Tribu program, ang IT team, mga lively host ug mga banggiitang performer. Nahimong MunaTo Queen si Merhyl Kit Angeline Paraluman, ang garbo sa Alabel, 1st runner up si Algelou Jane Bunquin taga-Maasim, ug ang 2nd runner up taga-Maitum nga si Jezzel Ann Ramos. Pang-world class performance pud ang gipakitang video sa mga empleyado sa LGU Malapatan sa natigayon nga Sarangani Got Talent, niabot na karon sa 32,000 views sa Facebook. Ang LGU Malapatan ang gideklara nga champion ug 1st runner up, ikatulong pwesto ang LGU Maasim nga aduna na usab 11,000 views.
(Source: PIO-Sarangani Province)
