Gikondena sa PISTON-Cebu Chapter ang giingong pagpanghasi ug pagdakop batok sa mga aktibista, tigpanalipod sa tawhanong katungod, ug mga kawani sa mga non-government organization (NGO).
Sa ilang pamahayag kagahapong Setyembre 3, giingon sa grupo nga lakip sa ilang gikondena ang pagdakop kang Juan Ruiz sa Bayan Muna niadtong Agosto 30, ug ang pagpagawas og warrant of arrest batok kang Jhonggie Rumol ug Dyan Gumanao.
Matod sa PISTON-Cebu, giisip nila nga walay lig-on nga basehan ang mga kaso batok sa maong mga indibidwal.
Matod pa sa grupo, nakatigom sila og ₱120,000 alang sa piyansa ni Juan Ruiz ug nakagawas kini sa prisohan niadtong Setyembre 2.
Nangayo usab sila og tabang alang sa piyansa ug legal nga depensa nila Rumol ug Gumanao.
Gikondena usab sa PISTON-Cebu ang giingong hulga sa kinabuhi ni Ramon Rescovilla, National Vice President sa PISTON, ug ni Atty. Bart Rayo sa NUPL-Albay.
Nanawagan ang grupo nga imbestigahan ang maong mga hulga, ihunong ang red-tagging ug pagpanghasi, ug ibasura ang ilang giingong walay basehang mga kaso.
I via Renante Socia Lada