Zamboanga del Sur – Nakakuha og duha ka pasidungog ang Zamboanga del Sur sa pinakaunang Regional Outstanding Communicators Award nga gipasiugdahan sa Mindanao Communicators Network IX ning milabayng Biernes, Disyembre 17, 2021 sa Grand Astoria Hotel, Zamboanga City.
Lakip sa mga nasungkit nga awards sa Zamboanga del Sur ang Best Provincial Government Implementer of Municipal Information Officers Network ug Best Municipal Information Officer nga nakuha ni Bayog Information Officer Ronald Amor.
Nasayran nga nakuha sa lalawigan ang pinakadaghang na-establisar nga Municipal Information Officers Network sa tibuok Rehiyon 9 diin nahimo kining posible pinaagi sa hiniusang pwersa sa Provincial Press Bureau ug Philippine Information Agency.
Nominado usab isip Best Local Government Unit Public Information Officer si ZDS-PIO Jeesrel Himang.
Wala makatambong sa maong event ang representante sa probinsya tungod sa conflict of schedule ug epekto sa Bagyong Odette.
Ang pinakaunang Regional Outstanding Communicators Award (ROCA) naghatag og pag-ila sa mga paningkamot ug kakugi sa mga regional and local information officers sa Zamboanga Peninsula taliwala sa COVID-19 pandemic.
Gipasundayag sa maong kalihukan ang mga award sama sa outstanding information volunteer, best barangay information officer ug municipal information officer, best implementer of barangay information officer network ug municipal information officer network, local government public information officer of the year ug regional information officer of the year.
(Source: Zamboanga del Sur Press Bureau, photo courtesy of PIA-9)
