Nagmalampuson ang pagpahigayon sa unang panagtigum alang sa 1st quarter ang City Advisory Council (CAC) sa Dipolog PNP ug ang PGS (Performance Governance System) Technical Working Group (TWG) nung Enero 27, 2022, gumikan sa 99% nga pagtambong sa mga miyembro niini nga gipangunahan ni PLTCOL Edwin D. Verzon, ang Acting Chief of Police sa DCPS, ug sa CAC Vice Chairman niini nga si Hon. Raul C. Barbaso.
Atol sa nasangpit nga panagtigum, gipresentar sa Dipolog City PNP ang sitwasyon sa Peace and Order sa dakbayan ug ang kalampusan sa pagpahigayon sa ilang mga programa, proyekto ug kalihukan. Gani, mitala sa 18.78% ang crime rate sa peace and order ug 83% sa crime solution efficiency ang Dipolog PNP sa milabayng tuig 2021.
Giila usab ni PLTCOL Verzon ang kamahinungdanon sa papel sa City Advisory Council alang sa pagkab-ot sa mga tumong sa PNP P.A.T.R.O.L Plan 2030 ilawom sa Performance Governance System duyog sa pakig-alayon sa TWG. Mipasalig si Verzon nga iyang dugang lig-onon ang relasyon tali sa PNP ug CAC aron tukma nga makab-ot ang mga plano ug programa sa PNP P.A.T.R.O.L Plan nga nagtumong sa pagproteher ug kaluwasan sa publiko tali sa mga kriminalidad.
Sa kabahin usab ni CAC Vice Chairman Konsehal Raul C. Barbaso, iyang gipadayag ang bug-os nga pasalig ug suporta gikan sa mga miyembro sa CAC, kinsa nagrepresentar sa mga nagkala-in la-ing sektor sa katilingban, nga matabangan ang Dipolog PNP sa tumong ug tinguha niini sa pagpanalipod ug kaluwasan sa komunidad tali sa kriminalidad. Dugang ni Konsehal Barbaso nga ang CAC mohimo usab sa ilang kaugalingong inisiyatibo nga alayon sa mga plano, programa, ug kalihukan sa PNP, nga maoy mamahimong dalan sa kahapsay ug kalinaw sa dakbayan sa Dipolog.
Gawas sa mga regular nga miyembro sa CAC, gipalapdan ang sectoral membership niini sa Dipolog PNP nga naglangkob sa sector sa LGBT, organisasyon sa pagpanalipod sa kina-iyahan, senior citizens, muslim brothers, academe, media ug motorcab drivers ug operators.
(Source: Dipolog City Government Facebook page)