Mapasalamaton si 2nd District Representative Glona G. Labadlabad tungod kay gihatagan siya’g oportunidad nga makaserbisyo sa katawhan sa Segundo Distrito.
Kini ang pamahayag sa Kongresista atol sa gipahigayong Turn-Over Ceremony sa Drainage Canal sa Purok 2 sa Brgy. Sta. Isabel ning dakbayan sa Dipolog nga nagkantidad og ₱ 2, 210,191.45 kaganinang buntag, Nobyembre 16 ning tuiga.
Unang gihimo ang ribbon cutting didto mismo sa project site sa presensiya sa Kongresista uban nila ni konsehal Praxides Rubia nga nag-representar ni Mayor Darel Dexter T. Uy, Bokal Romulo Soliva nga nag-representar usab ni Gov. Roberto Y. Uy, Punong Barangay Rodel C. Enero ug mga miyembro sa konseho sa Brgy. Sta. Isabel.
Gisunod gilayon ang programa didto sa Barangay Hall diin gipahigayon ang pormal nga pagtugyan sa yabi sa kaakohan og ning higayona, mitambong si kanhi Dipolog City Mayor Evelyn T. Uy.
Sumala sa kanhi mayor, isip unang ginang sa probinsiya sa Zamboanga del Norte ug nakasilbi usab isip mayor sa Dipolog sulod sa siyam ka tuig, siya nalipay nga kining nasangpit nga proyekto maoy usa sa mga rason nga walay baha sa dakbayan. Samtang si Konsehal Rubia usab mipahayag nga ang kalamboan sa barangay mo-epekto usab sa kalamboan sa siyudad ug niini mapasalamaton ang kagamhanang lokal ngadto sa kongresista.
Nasayran nga niining kapin dos milyones ka pesos nga proyekto, adunay counterpart ang BLGU (Barangay Local Government Unit) nga ₱ 250,000.00 aron hingpit kining ma-kompleto.
(Source: City Information Office | Dipolog City Government Facebook page)
