General Santos City – Onse ka mga kanhi miyembro sa New People’s Army ang nahatagan og tukmang ayuda sa lokal nga kagamhanan human sila mi-surrender sa militar.
Gihangop ni Mayor Dibu ang mga NPA surrenderee human sila misurender sa mga sakop sa 5th Special Forces Battalion sa Philippine Army pinaagi sa usa ka simple nga seremonyas nga gipahigayon sa munisipyo sa T’boli niadtong Lunes.
Ang mayor niingon nga ang mga misurender nga mga rebelde kanhi sakop sa NPA Guerilla Front 73 ug Musa nga nag-operate sa tri-boundary sa South Cotabato, Sarangani ug Sultan Kudarat.
Dugang pa sa mayor nga napugos sila sa pag-surrender tungod sa walay puas nga community outreach program nga gilusad sa lokal nga kagamhanan sa mga hilit nga komunidad sa lungsod.
Matod ni Lt.Col. Zandro Alves, 5th Special Forces Battalion commander, kinsa nakahukom nga itugyan ang mga rebeldeng NPA aron makabenepisyo sa programa sa gobyerno subay sa direktiba ni Pres. Duterte nga tapuson na ang problema sa local communist insurgency.
Matod sa mga NPA surrenderees, nagkahuyang ang suporta sa masa sa rebeldeng grupo maong nakahukom sila nga biyaan ang komunistang pakigbisog batok sa gobyerno.
Gidugang pa niini nga nagsilbi sila nga community organizers sa NPA nga gitahasan sa pag-organisa sa lumad ug sektor sa mag-uuma aron magwelga batok sa gobyerno.
Gi-surrender usab sa mga NPA ang mga tag-as nga kalibre sa armas lakip ang usa ka Browning automatic Rifle, M1 Carbine rifle, tulo ka M-79 grenade launcher ug usa ka .45 cal. Pistol.
Matag usa sa mga ni-surrender nakadawat og ₱ 10,000 nga cash assistance gikan sa lokal nga kagamhanan ug Kongresista Ferdinand Hernandez ug tunga sa sakong bugas.
(Source: 5th Special Forces Battalion, AFP)