Napintas a panangkumbinsir tapno maallukoy dagiti local ken ganganaet a negosyante nga umay agpuunan ditoy Ilocos Norte.
Daytoy ti nagbalin a karit ni Gob. Matthew Marcos Manotoc kadagiti nagatendar iti Workshop in Local Investment and incentive code updating iti provincial auditiorium nga inwanwan ti invest office nga idadaulwan ni Ms. Soya Cheng Bueno.
Maibilang kadagiti nagatendar ket dagiti pannakabagi ti Business Permit ken Licensing division manipud kadagiti nagduduma nga ili ken dua a ciudad ditoy Ilocos Norte a naangay iti provincial auditorium.
Ginutigot ti gobernador dagitoy nga aramiden amin a kabaelan iti epektibo a panangawis kadagiti negosyante tapno ad adu pay dagiti maguyugoy nga umay agnegosyo ditoy Ilocos Norte.
Masapul nga ilawlawag kadagiti maseknan nga investors dagiti napipintas a maipaay a pagsayaatan ken insentibo para kadakuada.
Kuna ti gobernador a napintas a lokasion ti Ilocos Norte a pangipasdekan iti negosio gapu ta asideg iti get way ti East Asia ken china ken agpadpada nga addaan iti seaport ken airport.
Mamati ti ama iti probinsia a babaen iti adu nga investors nga umay ditoy Ilocos Norte mapataud met iti adu a pagtrabahuan ken pamastrekan dagiti kaprobinsiaan a maysa daytoy kadagiti ipangpangrunana iti babaen ti administrasion na.
(Source: Provincial Government of Ilocos Norte)