Mokabat sa 48 ka surgical procedures ang nahimo sa Cebu Provincial Hospital–Bogo City gikan Agosto 21 hangtod 23 isip kabahin sa 457th Founding Anniversary sa Cebu Province.
Sa 48 ka operasyon, 15 ang operasyon sa gallbladder, 20 ang AV fistula procedures, samtang 13 ang uban pang operasyon sama sa thyroid, parotid, hernia ug pagtangtang sa mga bukol o abnormal nga parte sa lawas.
Ang mga pasyente gikan sa Bogo City ug mga silingang lungsod sa Northern Cebu, lakip ang Daanbantayan, Medellin, San Remigio, Tabogon ug Tabuelan. Gi-evaluate ug gi-screen daan ang mga pasyente pipila ka semana sa wala pa ang operasyon.
Gawas sa surgical mission, gipahigayon usab ang medical consultation, dental services, eye services ug legal assistance sa Bogo City Sports Complex niadtong Agosto 22.
Gipasalamatan sa mga organizer ang mga doktor, nurse, dentist, optometrist, abogado, estudyante, volunteers ug nagkalain-laing grupo nga mitabang sa tulo ka adlaw nga medical mission.
Ang programa gitumong aron mapaduol ang mga serbisyong panglawas ngadto sa mga molupyo sa Northern Cebu, ubos sa panawagan nga “People First. Service First. No Cebuano Left Behind.”
I via Renante Socia Lada