Gipalugwayan sa Cebu Provincial Government ang pagdili sa pagsulod sa buhing baboy, karne sa baboy ug mga produktong gikan niini gikan sa Negros Island ug uban pang lugar nga apektado sa African Swine Fever o ASF.
Gipagawas ni Gov. Pamela Baricuatro ang Executive Order No. 44 niadtong Agosto 20, 2026, nga nagpalugway sa ban og laing 45 ka adlaw.
Tungod niini, mahimong moabot sa 90 ka adlaw ang kinatibuk-ang pagdili nga unang gipahimutang ubos sa Executive Order No. 38.
Apil sa gidili ang pagdala, pagbiyahe, ug pagsulod sa Cebu sa buhing baboy, presko o frozen nga karne sa baboy, processed pork products ug uban pang produkto nga gikan sa baboy gikan sa mga lugar nga apektado sa ASF.
Gimandoan usab ang mga awtoridad nga palig-onon ang inspeksyon sa mga pantalan, airport, pantalan sa barko, roll-on/roll-off facilities ug uban pang entry points. Ang mga shipment nga gidudahang adunay gidili nga produkto mahimong inspeksiyunon ug kung supak sa balaod, mahimong dili pasudlon, kumpiskahon o ipabalik.
Gipalig-on usab ang biosecurity measures sa mga hog raiser, farm, meat dealer, slaughterhouse ug mga nagdala og baboy. Ang mga tag-iya sa farm gimandoang magpatuman og disinfection, limitahan ang pagsulod sa dili awtorisadong tawo ug i-report dayon sa veterinarian ang mga baboy nga adunay sintomas nga posibleng may kalabotan sa ASF.
Padayon usab nga susihon sa Provincial Veterinary Office ang kahimtang sa ASF aron matino kung ipadayon, usbon o tangtangon ang ban.
I via Renante Socia Lada