Posibleng mag-atubang og kriminal ug administratibong kaso ang usa ka magtutudlo gikan sa Danao City, Cebu, human nalambigit sa usa ka kontrobersyal nga komento sa social media batok kang Palace Press Officer ug PCO Undersecretary Atty. Claire Castro, sa nakalabay nga mga adlaw.
Ang maestra nalambigit sa usa ka komento sa facebook diin adunay giingong hulga batok kang Castro. Mikaylap kini online ug nakadani og daghang reaksyon gikan sa publiko.
Matod ni Castro, posibleng mag-atubang og grave threat ug uban pang kaso ang maestra tungod kay ang giingong hulga gihimo pinaagi sa internet. Mahimo usab siyang mag-atubang og administratibong kaso nga posibleng makaapekto sa iyang trabaho isip magtutudlo.
Nakapagpagawas usab ang maestra og online nga pagpangayo og pasaylo kalabot sa maong kontrobersiya. Apan, wala pay klaro kung pormal nang gisang-at ang kaso batok kaniya.
Gipahinumdoman ni Castro ang publiko, ilabi na ang mga magtutudlo, nga mahimong responsable sa matag pamahayag nga ilang ipang-post sa social media. Matod niya, kinahanglan hunahunaon pag-ayo ang mga pulong nga gipangpadayag online tungod sa posibleng legal ug administratibong sangputanan.
I via Renante Socia Lada