Cebu City- Usa ka pribadong ospital sa dakbayan sa Lapulapu ang nahunahunaan nga ilakip sa mga lugar nga himoan sa testing sa coronavirus disease kun Covid 19.
Naapil sa talaan nga gipagawas sa Department of Health kagahapon ang ARC Hospital sa brgy. Agus.
Sa maong listahan, makita ang ngan sa mga tambalanan ug laboratory nga gi-assess sa tibuok nasod pag-ila sa kapasidad paghimo sa Covid 19 test.
Kon kini matuman, mao pa kini labing una nga pribadong ospital sa Cebu ug sa region 7 nga maka-test sa coronavirus.
Pagka karon, anaa pa sa Stage 1 sa accreditation process ang maong tambalanan na nagpasabot nga ang management niini kinahanglan pang mohimog self-assessment pinasikad sa ‘assessment tools’ nga gihatag sa Research Institute of Tropical Medicine (RITM).
Ang naasoyng mga tools naglakip sa access sa laboratoryo, desinyo sa laboratoryo, gamit sa laboratoryo, administrative control & management, records & documentation, ug personnel practices & training.
Sa pagka karon, ang Vicente Sotto Memorial Medical Center (VSMMC) mao pay bugtong pasilidad sa Central Visayas nga kalipikado sa paghimo sa COVID-19 test diin apil sa mga swab sample nga ilang atimanon ang gikan sa Eastern Visayas, Northern Mindanao ug Caraga region.
