Tiene omento cuatro barangays aqui na ciudad de Zamboanga el ya declara limpio desde’l droga ilegal, asegun con el Philippine Drug Enforcement Agency (PDEA) del Lunes.
Asegun con Maharani Gadaoni-Tosoc, el director regional del PDEA, el declaracion ya hace durante el deliberacion del Regional Oversight Committee on Barangay Drug Clearing (ROCBDC) del otro semana na cuarto de conferencia del City Hall.
Asegun con Gadaoni-Tosoc, el mga barangay de Dulian-Upper Bunguiao, Latuan, Lubigan, y Sinubong ya pasa na evaluacion del mga miembros del ROCBDC y ya dale canila el certificaciones como barangay limpio de droga ilegal efectivo imidietamente.
Mientras tanto, asegun con Gadaoni-Tosoc, el 19 barangay que de mas temprano ya declara limpio de droga ilegal ya retene el de ila estado y un barrio el ya retene el estado condicionalmente.
Si Gadaoni-Tosoc ya asegura cay hay suporta sila con el mga barangays declarao limpio de droga ilegal y con el gobierno local na implementacion del programa de Barangay Drug Clearing para proteje con el comunidades and vivientes que ta servi sila. (B. Garcia)