Si Brigadier General Alvin Luzon, el comandante del 101st Infantry Brigade, ya hace un visita historica del Jueves na comunidad del Moro Islamic Liberation Front (MILF) na Barangay Guinanta, Al-Barka, Basilan, asegun con el militar del Lunes.
Asegun con el 101st Infantry Brigade, si Luzon amo el primer comandante del mando quien ya visita y entra na mencionao comunidad del MILF na Guinanta, Al-Barka que ta encabesa si Ustadz Hud Limaya, el diputado comandante del 114th Base Command del MILF.
Asegun con el 101st Infantry Brigade, el intencion del visitada amo para ase mas mafuerza el asociaciones, coordinacion y cooperacion entre el fuerza de gobierno y MILF na Basilan para sustene el paz y desarollo del provincia.
El visitada ya abre tamen el camino para el buen futuro de compromiso con el MILF por medio de formentar dialogo constructivo y cooperacion que hay tene significante efecto na comunidad local.
Omento na dalida de librao permiso de pasada, como un gesto de buena fe, ya dale mga saco de arroz con Limaya y su meimbros durante el visitada de Luzon, que ya resulta na todo suporta y buena fe desde con el mga lideres local y residentes.
Presente durante el visitada y dialogo de Luzon y Limaya amo mga oficiales del militar y gobierno y tambien de organizaciones civico. (B. Garcia)