Pabilin nga nagbarug ug waya matumba ni Super Typhoon Odette an bag-o na tower nan RPN DXKS bisan sa gipalakad nan pipila na kakumpetensiya na waya nay nagtingog na AM Station sa Surigao City.
An tower nan DXKS tag design nan RPN Engineering na makasugakod sa 300KPH na kakusgon na hangin.
Tagpaklaro isab sa network management na an karaan na tower sa Capitol road, Surigao City dili na ini tagpanag-iya nan RPN. Niadtong Hunyo 2019 mibalhin na sa bag-ong office sanan studio an RPN DXKS Surigao sa 3rd floor nan Yuipco Lim building sa dayan Borromeo.
Disyembre 16, 2021 gikuso-kuso an Surigao City ni Super Typhoon Odette ug grabe an nahiaguman na kadaut sa dakbayan. Kahamukan sa mga broadcast towers an gitumba ni Odette apan gikaluy-an an tower nan DXKS na pabilin nagbarug. Disyembre 17 nag-inspection sanan nag-clearing an engineering department sa facility hangtud naka-test broadcast gamit an generator. Disyembre 19 o adlaw’ng Dominggo pormal nga mibalik sa ON AIR broadcast an estasyon nga bugtong nagasibya sa Surigao City sa update sa relief and recovery operation.