Patay an isa ka residente sa Purok 2, Baranggay Trinidad, Surigao City dihang kini misukol sa mga police nga nag served nan warrant of arrest kaniya kaganihang alauna sa kaadlawon, Enero 20, 2021.
An may warrant of arrest nakilay-an na si Cecel Nuñez alyas Dennis, sakop sa Sandatahang Yunit Pampropaganda 16B, minyo, 59 anyos ug usa ka mag-uuma.
Nalista siya isip top 5 nga wanted member sa communist terrorist group tungod sa duha ka kasong murder na idja tag-atubang, Criminal Case Numbers 15066 sanan 15067 subay sa warrant of arrest na tagpakanaug ni Judge Jacqueline Ongpauco-Cortel niadtong Oktubre 27, 2020. Dili makapiyansa an akusado sa maong kaso.
An joint PNP Personnel gikan sa SDN Provincial Intelligence Unit pinangulohan ni Lt. Col. Rex Infante, 1st SDN PMFC pinangulohan ni Lt. Sayson Cañete sanan sa Surigao City Police pinangulohan ni Lt. Col. Christian Rafols II sa pagsilbi sa warrant, misukol an akusado pinaagi sa pagpabuto sa idja armas. Mibayos an PNP ug napatay an akusado.
Narecover sa SOCO pinangulohan ni Lt. Marlon Grejaldo kining mosunod: caliber .38 revolver na may serial number 7951310 na may duha ka bala, isa ka basiyo sa napabutong bala, lumping na tingga sa bala na napabuto, duha ka basiyo sa bala sa 9mm pistol, tipak sa tingga sa napabutong bala sanan may isa ka hand grenade sa kuwarto sa akusado.
An patay’ng lawas ni Cecel Nuñez an jaon kuman sa Nilo Funeral Services sa Baranggay Luna. (RPN DXKS)
