Taliwala sa giatubang nga health crisis karon, malampuson ang pinasahi nga pagbukas sa school year 2020-2021 kaniadtong Oktubre 5, niining tuiga sa 25 ka lungsod ning probinsya ug sa 35 districts sa Schools Division of Zamboanga del Norte.
Kini ang gipamahayag ni Schools Division Superintendent (SDS) Dr. Ma. Liza Tabilon atul sa pagpakighinabi kaniya.
Matud pa ni SDS Dr. Tabilon nga gumikan sa giatubang karon nga pandemya sa COVID-19 ang pamaagi karon sa klase mao ang Modular Distance Learning, diin modules lamang ang ipanghatag sa mga magtutungha aron maseguro nga magpadayon ang ilang edukasyon.
Kini gumikan usab sa hugtanong suporta sa lokal nga pangagamhanan, magtutudlo ug uban pang stakeholders sa komunidad.
Si Dr. Tabilon ang namahayag usab nga walay nahidangat nila nga taho nga nakasinati ug kalisud ang mga magtutudlo sa pagpanghatag sa modules bisan pa man ngadto sa hilit nga mga barangay.
Kini gumikan kay sa layo pa gipahibalo na nila ang mga pamaagi sa pagpangapud-apud niini.
Dugang ni Dr Tabilon nga kini mamahimong kuhaon sa ginikanan, o dili ba ang local officials mitabang kanila sa pagpanghatag niini.
Busa, wala sila nakahinagbo ug dagkong problema ug hapsay ang pagpahigayon niini.
Mapasigarbuhong usab gipahibalo ni Dr. Liza Tabilon nga ang Zamboanga del Norte maoy nag-una sa ihap sa learners sa laing duha ka probinsya dinhi sa Zamboanga Peninsula.
Ning maong school year 2020-2021, Ang Schools Division of Zamboanga del Norte adunay 228,230 learners o 105.63% gikan Kindergarten hangtud na sa Senior High School sa pampubliko ug pribadong tulunghaan, state universities ug colleges dinhi sa probinsya bisan pa man sa giatubang karon nga krisis.
Sa pagbukas usab sa klase, dungan nga gisaulog ang World Teacher’s Day.
Si Dr. Tabilon ang mipabati sa iyang pagpasalamat sa ilang sinsiridad ug nahimo sa pagserbisyo isip usa ka magtutudlo.
Dugang ni Dr. Tabilon nga sugod niining adlawa gipakita nila ang dedikasyon isip usa ka magtutudlo ug maghuhulma sa mga kabataan kinsa maoy umaabot naga lideres sa nasud.
Gipasalamatan usab ni Dr. Tabilon si Governor Roberto Uy sa hugtanong suporta alang ning maong matang sa pagbukas sa klase pinaagi na sa pagpahat ug budget alang niini.
Si Governor Uy mihatag kini ug 600 units sa computer sa kantidad nga 12 milyones ka pesos alang sa Schools Division of Zamboanga del Norte alang sa Digitized Learning Packages.
Kini ang gipangapud-apud na sa nagkalain-laing district sa maong schools division alang na sa Learning Hub.
Hinuon, giangkon ni Dr. Tabilon nga padayon pa usab ang paghimo sa learning hub sa mga distrito.
Nagpasalamat usab si Dr. Tabilon sa suporta sa mga magbabalaud sa tulo ka distrito ning lalawigan.
Gipahinumduman lamang ni Dr. Tabilon nga kanunay mosunod sa health protocols alang sa kaluwasan sa tanan. (Provincial Information Center-mbmontederamos)
