Cebu City – Naglaraw ang kagamhanan sa dakbayan sa Sugbo nga ipaagi sa cash cards ang paghatag sa hinabang salapi sa mga edaran inay sa personal o house-to-house.
Pagka karon, giplansa na sa gobyerno local ang maong sistema isip puli sa face-to-face nga pag-apod-apod sa tag-12 mil pesos nga ayuda sa mga senior citizens matag tuig.
Suma pa ni Mayor Edgardo Labella, ang LBP o Landbank of the Philippines miuyon na (in principle) sa paggamit og cash card sa pagpanghatag sa financial assistance.
Ang maong paagi misibo sa bag-ong normal diin gilikayan na ang panagdug-ol o close contacts sa usag-usa.
Ang task force  nga gipangulohan sa CTO o City Treasurer’s Office milihok na sa plano ug pag-umol sa sistema sa cash cards pinaagi sa LBP.
Gitataw ni Labella nga libre nga iapod-apod sa mga edaran sa 80 ka barangay ang naasoyng mga cash card.
Giangkon sa mayor nga ang naandang sistema sa distribution sa cash assistance dili luwas alang sa mga benepisyaryo nga gihulagwayng sayon matakdan sa Covid 19.
Kon aduna nay cash cards, ang mga edaran dili na magpaabot og petsa sa pag-apod-apod sanglit isud na man deretso sa ilang account ang kuwarta ug mahimo nilang makobra bisan unsang orasa.
(Jhon Tadlip/ JTY)
(Source: Cebu City Public Information Office)
