Cebu City – Wala nay dinugmok nga dolomite rocks gikan sa Cebu nga dad-on sa Manila aron iabuno sa baybayon sa Manila Bay.
Kini tungod sa pagluwat ni Gob. Gwendolyn Garcia og CDO o cease & desist order gahapon batok sa mining company ug sa mineral processing firm sa Alcoy.
Basi sa CDO, gipugngan ang duha ka kompaniya pagpangubkob, pagproseso, pagbaligya ug pagbiyahe sa dolomite uban sa mineral deposits ug ubang quarry resources.
Migawas ang maong mando nunot sa kontrobersiya sa puting bas diin 3,500 ka metriko toneladang dinugmok nga dolomite gikan sa habagatang lungsod sa Sugbo ang gigamit sa pagpaputi kunohay sa Manila Bay.
Sa sayo pa, ang mga environmental groups naalarma sa maong lakang ug mihulagway nga makadaot dili lang sa Manila Bay kondili hasta sa gigikanan niini Sugbo.
Sa iyang executive order nga nagmando sa pagpaundang sa operations sa duha ka kompaniya, si Garcia mi-invoke sa 2010 administrative order sa DENR nga naghatag sa mga LGUs og papel pagseguro nga masubay ang balaod sa public notice, public consultation, ug public participation.
Sa kabahin sa pag-transport sa minerales gikan sa Sugbo ngadto sa Manila, ang Kapitolyo miingon nga anaa ra sa kagamhanang probinsiyal ug sa lungsod sa Alcoy ang pagpahibawo nga ang dolomites gigamit sa Manila Bay project. (Jhon Tadlip)
(Source: Cebu Provincial Government)