Pagadian City – Automatic nga hatagan og slot sa Scholarship Program ang tanang existing kon kasamtangang engineering students sa Southern Mindanao Colleges sa Pagadian City ngadto sa Provincial Government. Matud ni DEPUTY SPEAKER – Congresswoman DIVINA GRACE YU nga mukabat sa 1,222 ka mga Engineering Student ang makapahimulos sa maong scholarship.
Sa official facebook page ni Congresswoam Divina Yu, gitino niini nga tabangan sa provincial government ang pag-eskwela sa 1,222 ka estudyante sa tanang engineering courses sa nasangpit nga kolehiyo, diin gilangkuban kini sa 59 ka mga estudyante sa Civil Engineering, 540 ka estudyante sa Special Construction, 355 sa Structural, 67 sa Computer Engineering, 182 sa Electrical Engineering, 12 sa Electronics Engineering ug 7 ka estudyante sa Geodetic Engineering.
Gibutyag sa Congresista nga sukad 2007 dugay na silang nagsuporta sa sektor sa edukasyon pinaagi sa pag-establisar og Special Science Sections sa partnership niini sa DepEd ug DOST aron madasig ang mga estudyante sa pagkuha og technical courses sama sa engineering. Saludo usab ang kongresista sa tanang engineering students sa Pagadian ug Zamboanga del Sur tungod kay si Governor Victor Yu mismo usa ka inhinyero lakip ang iyang igsuong babaye ug lalaki nga pulos migradwar sa SMC.
Samtang dako ang pagtuo ni Congw. Yu nga dako og papel ang mga engineers sa atong komunidad tungod kay sila ang matawag nga magtutukod sa kaugmaon sa atong nasud.
(Source: ZDS Press Bureau, photo courtesy of Pagadian news icon)
