Gidawat sa Community Environment and Natural Resources Office o CENRO Piñan ang 32 ka Bachelor of Science in Forestry students nga magsugod sa ilang On-the-Job Training pinaagi sa orientation nga gipahigayon sa opisina sa CENRO Piñan sa Poblacion South, Polanco, Zamboanga del Norte.
Ang mga trainees naglangkob sa 14 ka estudyante gikan sa Mindanao State University-Marawi Campus, 13 gikan sa MSU-Naawan Campus, ug lima gikan sa Jose Rizal Memorial State University-Katipunan Campus.
Atol sa orientation, gipaila sa mga estudyante ang mandato sa opisina, mga lagda sa trabahoan, safety protocols ug mga responsibilidad nga ilang sundon samtang nagbansay. Giduso usab ang kamahinungdanon sa disiplina, propesyonalismo ug maayong pagtinabangay sa trabaho.
Sumala sa CENRO Piñan, ang OJT maghatag sa mga estudyante og aktuwal nga kasinatian sa pagpanalipod sa kalikupan, pagkonserbar sa kalasangan ug husto nga pagdumala sa natural nga kahinguhaan isip pagpangandam sa ilang umaabot nga propesyon.(JENIFFER JR. DELICA)
Source: DENR Zamboanga Peninsula