Sa tinguha nga mapakgang ang pagkaylap sa African Swine Fever (ASF) dinhi sa dakbayan sa Cagayan de Oro, ang konseho sa syudad ubos ni bise mayor Kikang Uy mipalabang sa ordinansa nga nagdili sa pagsulod sa baboy ug uban pang produktong karneng baboy gikan sa Luzon ug pipila ka bahin sa nasud ingon man gawas sa nasud diin nailhang adunay mga kaso sa ASF.
Kini human nasayran nga nakasulod na sa lima ka barangay sa dakbayan sa Cagayan de Oro ang ASF taliwala sa mga paningkamot sa gobyerno nga mapakgang ang maong panghitabo.
Gani, aduna nay gipatuman nga mga animal quarantine checkpoints dinha sa mga nahisgotang barangay apan namatikdan nga aduna gihapoy movement sa mga baboy gikan sa mga apektadong barangay ngadto sa laing mga barangay.
Si konsehal Jay Pascual, chairman sa komite sa agrikultura, mipasabot nga gikahadlokan nga kun kini magpadayon mokaylap sa tibouk dakbayan ang sakit sa mga baboy ug mas daghan na ang maapektohan.
Ubos sa ordinansa, gidili ang pagdala, pag-distribute ug pagbaligya sa mga binuhing baboy ingon man mga karne ug uban pang processed ug frozen pork products gikan sa mga apektadong lugar.
Niini, gidili usab ang online selling sa mga karneng baboy ug susamang produkto gikan sa mga ASF affected areas.
Ang ordinansa nagpahamtang og P5 mil nga multa o’ pagkapriso nga dili mominus sa unom ka bulan ug dili molabaw sa usa ka tuig alang sa mga masapong makalapas sa ordinansa.
(Sangguniang Panlungsod – CdeO)
