Gitakdang ipaubos sa mass swabbing ang mga sakop sa Cebu City Hall of Justice nga nahimutang sa Qimonda Building sa North Reclamation Area isip paagi sa pagsumpo sa pagkatap sa Covid-19 sa mga hukmanan.
Kini ang gibutyag sa kadagkoan sa Regional Trial Court sa siyudad atol sa unang Bench and Bar Dialogue nga giorganisar sa IBP o Integrated Bar of the Philippines karong tuiga.
Si Judge Marlon Jay Moneva, Executive Judge Regional Trial Court sa Cebu City, miingon nga nangayo silag pagtugot sa DOH o Department of Health sa pagpahigayon sa mass swab testing isip kabahin sa ilang paningkamot nga mapugngan ang pagkuyanap sa Covid-19.
Apan gitataw ni Moneva nga pending pa kini tungod kay gitimbang-timbang pa kon himoon ba kining compulsory o dili.
Pero kon siyay pabut-on, mas maayong tanan gyod ang magpa-swab aron walay motumaw nga pagduhaduha ug matuman ang katuyoan sa mass swabbing.
Midugang si Moneva nga sukad nagsugod ang pandemya, ang RTC-Cebu City nagpatuman na og temporaryong pagpasera sa RTC branch 6, 11, 14, 16, 19, ug 22.
Apan pagkakaron, ang branch 19 ug 22 na lay pabiling gi-lockdown samtang ang uban bukas na.
Gitaho usab niya nga adunay 28 ka aktibong kaso ang Hall of Justice sa Qimonda Center.
(Jhon Tadlip/JTY)
(News & photo courtesy of Office of the Executive Judge-RTC Cebu City)