Mokabat sa ₱ 15,277,400.00 million ang gitunol nga financial incentives sa pangagamhanang lokal sa Misamis Oriental ubos sa pamunoan ni Gobernador Bambi Emano ngadto sa mga teaching ug non-teaching staffs sa 23 ka munisipalidad sa tibuok lalawigan.
Atol sa virtual nga pagpakayab sa nasudnong bandila adlaw niining semanaha, nagpaabot sa ilang pasalamat sila Provincial Board Member Committee on Education Gerardo “Boboy” Sabal, Schools Division Superintendent Jonathan Dela Peña PhD CESO V Division of Misamis Oriental DepEd, Co-Chairman Local School Board, Local School Board Secretary Jerome Mundo ug mga magtutudlo.
Moabot sa 7,800 ka mga magtutudlo ug 600 ka mga non-teaching staffs sa lalawigan ang makadawat sa tag ₱ 2,000 nga financial incentives gikan sa pamunuan ni Gobernador Bambi.
Matag tuig kining gihatag isip balos ug pagrekognisar sa sakripisyo sa mga magtutudlo kon asa ilang gigahin ang ilang dakong oras aron mahatagan og maayong pagtulun-an ang mga kabatan-unan sa lalawigan hilabina karon nga anaataliwala sa pandemya.
Matud sa amahan sa lalawigan nga sayod siya dili kini igo kong itandi sa kahago ug dedikasyon nga gihatag sa mga magtutudlo apan kini nga inisyatiba magsilbing pasalamat ug gamay nga tabang kanila gumikan sa padayon nga paghatag serbisyo aron makab-ot sa mga kabataan ang ilang maayong kaugmaon. (Public Information Office)
