Nadugangan pa og 106 ang ihap sa mga kaso sa coronavirus disease o Covid 19 sa dakbayan sa Sugbo ug kini pulos sa brgy. Mambaling.
Sa miaging adlaw, 182 usab ang nadugang sa maong barangay hinungdang nahimo na kining epicenter sa virus sa siyudad.
Tungod niini, miabot na og 539 ang tanang nataptan sa Covid 19 sa nahisgotang barangay gikan sa 433.
Isip usa sa labing dako nga barangay sa siyudad nga adunay labing minos 40 mil ka mulupyo, paspas nga mikatap ang virus sulod lang sa halos tulo ka semana.
Gani, ang sityo Tinabangay diin natala ang 182 daan nang gipaubos sa lockdown sukad sa unang nagpositibo duha ka semana ang nakalabay.
Ang Mambaling Elementary School ang bugtong isolation center sa lugar nga aduna lay 120 ka higdaanan para sa asymptomatic nga mga pasyente.
Apan matod ni Kapitan Genes Abellana, dili pa niya i-lockdown ang tibuok barangay ug ang mga nagpositibo anaa lang una sa ilang tagsatagsa ka balay samtang giandam pa ang isolation center.
Ang brgy. Luz nadugangan usab og usa partikular sa sityo Cabantan hinungdang nahimo nang 193 ang tanan.
Walo usab ang uwahing natala sa brgy. Carreta busa miabot na og 12 ang tanang kaso.
Gawas niini, padayong gimonitor sa siyudad ang 209 ka gidudahang nataptan sa virus samtang 159 ang clear o negatibo na.
