Gipasalamatan ni Police Col. Paul Bometivo ang katawhan sa dakbayan ingon man ang managlahing grupo ug organisyon atol sa gihimong exit speech niini dungan sa turnover of command gumikan sa suportang gihatag kaniya isip acting city director sa General Santos City Police Office sulod sa kapin walo ka bulan.
Sumala niya nga gumikan sa paglusad sa oplan tanglaw-lahi, ubay-ubay ang mga pagkunhod sa kriminalidad sa dakbayan.
Subay matud pa sa datus, sa unang kwarter sa 2022, miubos ug 14% ang crime volume sa syudad, 5% sa 2nd quarter ug 7% sa 3rd quarter.
Dugang pamahayag ni Pcol. Bomitivo nga gikan Enero hangtud Setyembre, anaa sa 40 ka mga search warrant operation ang napahigayon sa GSCPO, 273 nga operasyon sa illegal nga droga nga miresulta sa pagka-kumpiska sa mukabat 9, 813, 681 ug pagka-aresto sa 350 nga mga supek.
Anaa usab sa 117 nga operasyon batok illegal nga sugal ang ilahang nahimo, 239 nga mga loose firearms ang narekober, pagka-aresto sa 239 nga mga wanted person kung asa 99 niini ang gikonsiderang most wanted person.
Dako ang pagpasalamat niini sa kapulisan sa dakbayan ug siya nanghinaut nga samang suporta ang ihatag ngadto sa bag-ong acting city director sa dakbayan.
(Alfredo Madas Jr.)
