Gipromote ug giparegular sa Cebu Provincial Government ang 118 ka healthcare workers kagahapon Agosto 17, 2026, ubos sa administrasyon ni Gov. Pamela Baricuatro.
Lakip sa mga napermanenteng empleyado si 49-anyos Rubylyn Dumdum, nga nagtrabaho isip cook sa Cebu Provincial Hospital-Balamban ug 18 ka tuig nga naghulat aron makakuha og regular nga posisyon.
Nanumpa ang 118 ka personnel atol sa mass oath-taking ceremony nga gihimo sa Cebu Provincial Hospital-Balamban. Kini ang unang higayon nga adunay ing-ani nga seremonya sa maong ospital sukad kini giablihan 41 ka tuig na ang milabay.
Lakip sa giparegular ug gipromote ang mga nurse, doktor, medical specialists, medical technologists, pharmacists, midwives, laboratory aides, respiratory therapists, ug administrative ug support staff.
Kabahin kini sa mga reporma ni Gov. Baricuatro aron madugangan ang mga healthcare workers ug mahatagan og permanenteng posisyon ang mga dugay nang nagserbisyo sa 16 ka ospital nga gipadagan sa Cebu Provincial Government.
I via Renante Socia Lada