Cebu City- Gisugyot sa Department of Labor & Employment kun DOLE-7 sa mga kompaniya ang pagpatuman sa gitawag og telecommuting o home-based work arrangement isip pamaagi paglikay sa pagkatap sa coronavirus disease kun Covid 19 sa mga dapit-trabahoan.
Si Direktor Salome Siaton sa DOLE-7 miingon nga ang kasamtangang 1,802 ka kawani sa 14 ka kompaniya sa Cebu apektado sa implementasyon sa flexible working hours, rotation of workers ug forced leaves.
Sumala pa ni Siaton, sagad sa maong mga establisimento anaa sa manufacturing, hotels, ug garments sectors, nga buot moimponer sa maong matang sa working arrangement aron paghupay-hupay sa alkansi nga ilang nasinati tungod sa travel ban nga gipatuman sa gobyerno batok sa mga nasod nga nabaniog sa Covid 19.
Ubos sa telecommuting, ang mga tabahante anha ra magtrabaho sa ilang balay susama sa job-out.
Matod ni Siaton, ang management modiskutir niining maong arrangement sa mga empleyado lakip sa matang sa trabaaho nga mohaom sa ingon ug sa klase sa output nga buot nilang makab-ot.
Midugang siya nga nakigtagbo na siya sa kadagkoan sa Cebu Chamber of Commerce and Industry ug sa mga sakop sa Industrial Tripartite Council (ITC) diin iyang gisugyot ang telecommutingisip alternatibo.
