Cebu City- Gipasalig sa grupo sa mga negosyante og baboy sa tungatungang Kabisay-an nga aduna pay igong suplay sa baboy ang Cebu sud sa tulo ka buwan taliwa sa hulga sa African Swine Fever kun ASF.
Si Rolando Tambago, presidente sa Central Visayas Pork Producers Cooperative kun CeViPPCo, miingon nga dili kaayo mabatyagan sa mga Sugboanon ang impak sa gipalapdan nga ban sa mga karne ug produktong baboy gikan sa mga dapit nga adunay ASF sa mosunod nga tulo ka buwan.
Matod pa ni Tambago, naglaom siya nga human sa tulo ka buwan madugangan ang produksiyon sa local suppliers.
Sa nasayran, gipalapdan sa probinsiya ang ban sa pork products diin giapil na ang gikan sa Mindanao nunot sa taho sa presensiya sa ASF sa pipila ka baboyan sa naasoyng rehiyon.
Sumala pa ni Tambago, aron pagbangil sa posibleng pagnihit sa suplay sa karneng baboy, ang Virginia Farms, Inc. naningkamot nga dili matandog sa ban ang suplay sa pork ug pork products sa kamerkadohan.
Ang Virginia Farm, ang labing dako nga farm-to-pork business sa Central Visayas, malaomon nga mahibalik ra sa normal ang kahimtang sa hog industry sa rehiyon.
Si Tambago nga mao usay presidente sa Virginia Farms mipahibawo nga nagplano sila pagbukas og dugang 16 ka sanga sa retail outlet nga The Pork Shop sa Cebu ug Panay island.