Sa padayong pag-implementar sa Vaccination Against Covid-19 (Vac-To-Normal) Incentive Program dinhi sa dakbayan, traynta (30) ka mga “motorcabs” uban sa ilang mga “drivers” ug “operators” nga naka-uyon sa mga “safety protocols” nga gipatuman dinhi sa dakbayan ang malampusong na-“confer” sa Vac-To-Normal Safety Seal sa Kagamhanang Lokal kaniadtong Disyembre 10, ning tuiga didto sa Museo Dipolog Driveway, ning dakbayan sugod sa may alas-9:00 takna. Ang maong kalihokan ang gipangunahan sa CMO – Permits & License Division uban sa buhatan sa City Disaster Risk Reduction and Management, tanan dinhi sa dakbayan.
Mitambong sa maong kalihokan sila si City Vice Mayor Horacio B. Velasco, Permits & License Division Chief, Ms. Viola A. Pino, CDRRM Officer, Atty. Arvin L. Bonbon, kinsa mipabati sa ilang tagsa-tagsa ka mga mensahe kabahin sa mga insentibo nga mapahimuslan sa Vac-To-Normal Incentive Program lakip na ang pagdumala sa pagpatapot sa mga “safety seal stickers” ngadto sa mga “compliant motorcabs”. Mitambong usab sila si OIC – Assistant City Information Officer, Mr. Alan Francisco L. Bengua ug PLT Berjohn Tianok, kinsa mirepresentar ni Acting Dipolog PNP Chief, PLT COL Edwin Verzon alang sa pagsaksi sa gipahigayon nga kalihokan.
Sumala sa pagpatin-aw nila ni Ms. Pino ug Atty. Bonbon, mahimo nga makapasakay hangtod sa lima (5) ka bakunadong pasahero ang maong motorcab nga napataptan sa “Vac-To-Normal Safety Seal”. Nagpasabot usab kini nga ang maong motorcab driver nga nagmaneho sa motorcab ang bakunado usab. Busa tungod niini, kampante alang sa mga pasahero nga musakay sa nasangpit nga motorcab nga gi-“confer” sa Vac-To-Normal Safety Seal/Certificate.
Alayon niini, dugang gi-awhagan ni Ms. Pino ang ubang mga “motorcab drivers/operators” nga mopahimulos ning maong programa nga tuyong gimugna sa Kagamhanang Lokal ning dakbayan ilawom sa liderato ni City Mayor Darel Uy, isip tabang ngadto sa sektor sa transportasyon, ning siyudad.
(News and photo courtesy of Dipolog City Government Facebook page)
