Gikatakdang sugdan na sa paglusad karong umaabot Nobyembre 22, ning tuiga ang VACCINATION AGAINST COVID 19 (VAC-TO-NORMAL) INCENTIVE PROGRAM alang sa mga balay patigayon dinhi sa siyudad.
Mao kini ang nasayran atol sa panagtigum sa mga nagkalain-laing buhatan nga may kalambigitan sa pagpatuman ning maong programa dinhi sa atong dakbayan.
Ilawom ning maong programa, paga-mugna-on ang mga “Safety Zones” isip klasipikasyon sa mga balay patigayon, kansang operasyon niini, partikular dinha sa pag-akomodar sa mga kustomer ang maga-agad sa ma-aprobahan nga klasipikasyon niini.
Matud pa nga kining nasangpit nga programa ang tuyong gimugna sa atong kagamhanang lokal ug sa City IATF, aron mapadali ang atong gihandum nga economic recovery alang sa sektor sa patigayon ug dugang pagdasig niadtong walay bakuna nga magpa bakuna na.
Kining maong programa ang ilusad ilawom sa pagpalig-on sa Orden Ehekutibo no. 38 serye ning tuiga, nga nagmugna ning VACCINATION AGAINST COVID 19 (VAC-TO-NORMAL) INCENTIVES PROGRAM” nga giluwatan ni City Mayor Darel Dexter T. Uy, pinetsahan og Oktubre 29, ning tuiga, diin sa uban dapit susama usab ang gihimo ilawom sa pagtugot sa NIATF isip tabang sa pagpabangon pagbalik sa atong ekonomiya dinhi sa nasud.
Ilawom niini, ang mga balay patigayon ang mahimong mo-apply basi sa ilang gitinguha nga klasipikasyon, VAC SURE ZONE o VAC SAFE ZONE.
Ubos ning maong duha (2) ka mga klasipikasyon, ang mo-apply nga balay patigayon ang kinahanglan nga motamod sa mga gabay niini sama sa: A) VAC SURE ZONE, kinahanglan nga ang tanang mga kawani niini ang bakunado, ug kini ang maka-alagad sa mga kustomer nga bakunado ug dili bakunado, apan ang kapasidad nga gitugot niini ang gikan sa 10 % ngadto sa 40% lamang, samtang sa VAC SAFE ZONE, ang tanang mga kawani niini ang kinahanglan nga bakunado ug kini ang mo-akomodar sa mga kustomer nga bakunado lamang uban sa gitugot nga 100% nga akomodasyon.
Sumala pa, nga sa niini nga programa, mamahimo na nga mahibalik ang normal nga pagpadagan dinha sa mga patigayon dinhi sa siyudad, basta magsanong lang ang atong mga balay patigayon kalabot niini.
Kalabot sa dugang detalye alang sa pag-apply niini, gi-awhagan kadtong mga balay patigayon nga nagtinguhang mopahimulos niini, sa pagbisita lang sa buhatan sa Permits and License Division, sa buhatan sa Mayor, ug sa pagpakigkita ni License Chief, Viola A. Pino.
Ning susamang kalamboan, naglaraw usab karon ang kagamhanang lokal ning dakbayan uban sa City Inter-Agency Task Force nga kining susamang Covid 19 Incentive Program ang i-apply usab ngadto sa tanang mga de pasahero-ang motorcabs, pinaagi sa paghatag og insentibo ngadto sa driver pinaagi sa pagtugot niini nga mo-akomodar ngadto sa 100% capacity (full load capacity), basta ang driver ang bakunado, uban sa pagpasakay sa mga bakunadong pasahero lamang, apan kon ang driver ang walay bakuna o kaha ang pasahero niini ang wala’y bakuna, kini ang paga-tugotan nga mopasakay sa allowable nga tag-duha (2) lamang ka pasahero.
Dugang gipaklaro sa IATF, nga kining maong programa ang gihimo isip pagtabang dinha sa hinay-hinay nga pagpabangon sa atong lokal nga ekonomiya, ingon usab sa pag-engganyo niadtong mga walay bakuna nga magpa-bakuna, aron mapadali ang atong pagkab-ot sa herd immunity dinhi sa atong dapit.
(Source: City Information Office | Dipolog City Government Facebook page)
