Gisugdan kagahapon, Septiyembre 5, 2026, ang 1st Municipality of Rizal VIS-MIN Open Karate Championship sa Perfecto C. Cebedo Cultural and Sports Center, Rizal, Zamboanga del Norte, ug magpadayon hangtod karong adlawa, Septiyembre 6.
Mitigom sa maong kompetisyon ang mga batid nga karate athletes gikan sa nagkalain-laing bahin sa Visayas ug Mindanao, lakip ang mga international medalists, Batang Pinoy National Medalists, SCUAA National Medalists, ug uban pang top-caliber athletes.
Gidumala ang kompetisyon sa mga licensed ug eksperyensiyadong referees ug judges aron masiguro ang patas ug hapsay nga pagpadagan sa mga duwa.
Usa sa mga gipasiugda sa kompetisyon ang Traditional Full Contact Karate, nga nagdala og mas kusog ug agresibong aksyon nga susama sa mga full-contact bouts kaniadto sa dekada 1980 ug 1990.
Nagpakita ang mga atleta sa ilang kapaspas, kusog, teknik ug disiplina samtang nag-indigay alang sa championship honors.
Gilauman nga magpadayon ang mainit nga kompetisyon karong katapusang adlaw, diin tukion ang mga kampeon sa nagkalain-laing categories.(IKEN B. GULLEM)
Source: Zamboanga del Norte Provincial News Network